ســن ياريميـن قاصـديســن 

ائيلـن سـنه چاي دئميشم

خيالينــــي گؤنــدريـــب دير 

بس كي من آخ واي دئميشم

آخ گئجـــه لر ياتماميشـــام 

من سنه لاي - لاي دئميشم

ســن ياتالـي مـن گؤزومـــه 

اولدوزلاري ساي دئميشم

هركس سـنه اولدوز دييــه 

اؤزوم سـنه آي دئميشــم

سنـــدن صـــوْرا حياتــه مــن 

شيرين دئسه زاي دئميشم

هر گؤزه ل دن بير گول آليب 

سـن گؤزه له پاي دئميشـم

سنيـن گون تـك باتماغينــي 

آي بـاتـانـا تـاي دئميشــــم

اينــدي يـايـا قيــش دئييــرم 

سابق قيشا ياي دئميشم

گــه تويونــي يـاده ساليـــب

من دلي ناي - ناي دئميشم

صوْنــرا گينــه ياســه باتيــــب

آغلاري هاي - هاي دئميشم

اتـك دوْلــــو دريـــــا كيــــمي

گؤز ياشيـما چاي دئميشــم

عؤمره صـوره ن من قارا گـون

آخ دئميشــم واي دئميشــم

دوت اليمدن بو همان الدي فراقينده سنون

ياديمه سالماق هامان باشه چالارديم گئجه لر

حسن رخساريوي رؤياده چكرديم قلمه

قلبيمي قاب ائليوب قابه سالارديم گئجه لر

بونا خاطير كي آدين دوشميه اغيار الينه

دوز كيمي آديني يازديقجا يالارديم گئجه لر

بئله سيزلاردي اوره ك يادينه سالديقجا سني

قوش كيمي يئرده دوشه رديم چابالارديم گئجه لر

بلكه سن ساغ ياشييب ساغ دولانيب ساغ گزه سن

گؤزه ليم هر قادان اوْلسايدي آلارديم گئجه لر

سن رقيبيمله گونوز سئيره چيخاردين چمنه

منده عشقينده سولارديم سارالارديم گئجه لر

گؤزلرين ياديمه دوشدوكجه اسه ردي بدنيم

سينه مه ديرناق آتارديم يارالارديم گئجه لر

تابلو اوستونده چكه رديم سني مين زحمتيلن

بير باخيب اوستونه تئز رنگي جالارديم گئجه لر

ايندي ده گئتمه ليسن گئت دئميرم من ده گليم

قاللام اوْل حالدا كي اوّلده قالارديم گئجه لر

مكتب عشقيده مجنونيله من باهم ايديم

غم ييغارديم سينه مه غصه قالارديم گئجه لر

مجنون اؤز عشقيني ليلايه گؤره بيلديردي

من گونوز يازديقيم عشقي قارالارديم گئجه لر

سلاملار سايغيلار

اللهين لوطفي سايه سينده بو وئبلاگ يني دن 

بوتون آذربايجان و تورك ادبياتينين عاشق لرينه خدمت ائليجاخ

بيزيمله اوْلون

عشقين مني دؤندردي گولوم بولبوله سنسيـــز

كؤنلوم توتولار باخسـام اگـر بير گولـه سنسيــــز

زولفـون اوجي گؤستــردي منه عشق كمنـــدين

دوشدوم يئنه مجنون كيمي ديلدن ديله سنسيز

بير گون اوزونون هيجري بيرآي اوْلدو گؤزومــده

زولفوندن ايراق دؤندي گئجه م بير ايله سنسيز

ليلاسـي ايچـون دؤزمـه دي بيـر محنته مجنــون

حق عاشقي يم دؤزموشم هر مشكله سنسيز

هر عاشقيــن اؤز يارينــه ديـــر ميلي منيـــم ده

ميليم گوله يوْخدور هوسيم سونبوله سنسيــز

گؤزياشـي ايله بسلــه ديگيـم نخـــل اميــــديم

گلمه ز گؤزليم مين گول آچا حاصله سنسيــــز

سن گؤرسن اگــر واحدي رحمين گلــر اي گـول

بيچــــاره ائدير آه و فغان بيــــر بيلــه سنسيــــز

قامتـي شهنـازدي اينجـه ديــر بئــلي

من سئون گؤزه لين اداسي چوْخدور

آغيــر طايفالي ديـر، آغيــر ديــر ائــلي

مارال باخيشلي دير،گداسي چوْخدور

دوْداغي قونچـه دي ، قاشـلاري كمـان

بــاهــــارا بنــزه ييــر، بــاهــــارا اينــــان

اوْل شكيــل يارانيـــب سانــكي آنـادان

ظريف ديـر اوره يين صفاسي چـوْخدور

اينجـه ليــك ايشـله ديــب اوْنـو يـارادان

گؤزه لـــــدي آرازا بـــاتـــــان ســـارادان

آي كيـــمي اوزونــــده خالـــي قـارادان

طبيــب تك الينيـن شفـاسي چوْخدور

عجيبــه يارانيـــب هــر ايــشي اوْنـــون

كهليــگه بنـــزه ييــر يئــريشي اوْنـــون

آغزينــدا صدف تـــك آغ ديـشي اوْنـــون

خسته يه وئرمــه يه دواسي چوْخــدور

مارال تــــك ســـوزودور هردن گؤزونــــو

قاچيــر ديــــر هـردنـده منــدن اؤزونــــو

تيكنـــده گـؤزومـــه خـومـــــار گؤزونــــو

هؤروكلـر چيگنينـده قاراسي چوْخــدور

پابسته اوْلماسايديم اوْل گيسوي پر خمه

ديوانه ليكده شهرتيم ارمه زدي عالمه

هردم دوشنده رويينه اوْل زلف پر خمين

بنزر خزينه اوسته دوران مار ارقمه

لعلين ديريلدير اؤلدورور عشاقي اي صنم

يوخ احتياجيميز داها عيسي و مريمه

بيردانه الچين ائتمه ز ايدي ترك جنتي

خالين خيالي باعث اوْلوب دئرلر آدمه

زاهد بيلرمي؟ سريني غنچه دهانينين

واقف اوْلارمي؟ نا بلد اسرار مجمعه

ذوْق حياتيميز ره ميخانه لرده دير

وئرديك بهشتي بيز سنه زاهد، جهنمه

واحد زمانه ايچره تاپيلماز بير اهل دل

سانما وفالي باغلاما بئل يار و همدمه

سلاملار وئبلاگين عزيز اوخوجولارينا

تانرينين سؤنسوز لوطفي سايه سينده 

بو وئبلاگ بير ايلليق اوْلدو

اوميديم وار ائليه بيلم بوندان آرتيق بو وئبلاگدا سيزلره

 آذربايجان و تورك ملتينين بؤيوك شاعيرلريندن

ديه رلي شئعيرلر يازام.

تامام دوسلاردان كي مني بو بير ايلده حمايت ائليبلر 

تشكر ائليرم.

هامينيزا شادليق و ساغليق آرزيليرام

منده مجنوندان فزون عاشقليك استعدادي وار

عاشق صادق منم، مجنونون آنجاق آدي وار

نوْلا قان تؤكمكده ماهر اوْلسا چشميم مردمي

نطفه ي قابل دورور غمزه ن كيمي اوستادي وار

قيل تفاخر كيم سنين ده وار منيم تك عاشقين

ليلي نين مجنونو، شيرينين اگر فرهادي وار

اهل تمكينم، مني بنزتمه اي گول بولبوله

درده يوْخ صبري اونون هر لحظه بير فريادي وار

اؤيله بد حالم كي احواليم گؤرنده شاد اوْلور

هر كيمين كيم دوْر جوْروندن دل ناشادي وار

گزمه اي كؤنلوم قوشو غافل فضاي عشقده

كيم بو صحرانين گذرگاهيندا چوْخ صيادي وار

اي فضولي عشق منعين قيلما ناصحدن قبول

عقل تدبيري دير اوْل، سانما كي بير بنيادي وار

اي بي وفا گئتيرمه چوْخ افغانا كؤنلومو

يانديرما بونجا آتش هيجرانا كؤنلومو

بير دم گؤتور اوْل گول كيمي روخساردن نيقاب

اي سنگدل يئتيرمه بئله جانا كؤنلومو

قيل لوْح سينه مي هدف ناوك جفا

بير شاد قيل، بلالارا همخانه كؤنلومو

بير جورعه مئي دن اؤترو مني ائتمه دل كباب

دؤندرمه، ساقي جان بو قده ر قانه كؤنلومو

وئر باده، مست قيل مني، سال خُم اياقينا

دشت جنونه سالما بو ديوانه كؤنلومو

اي دلبر ستمگر و اي يار تند خوي

سالدين عجب اوْل چاه زنخدانه كؤنلومو

دؤور روْخوندا ووران زولف خم به خم

اوْلدور چكن كمنديله زندانه كؤنلومو

رحم ائيله بير بو گؤزدن آخان قانلي ياشيما

ائت بير نشان اوْل ناوك مژگانه كؤنلومو

بو مرغ دل كي دانه خالين اسيريدير

قيلميش يووا اوْل زولف پريشانه كؤنلومو

جلاد گؤزلرين سوساييب ياخشي قانيما

ايستر كي غمزه دن ائده ويرانه كؤنلومو

بيلمم منه نه سئحر اوْخودو مست گؤزلرين

مجنون كيمي توش ائتدي بيابانا كؤنلومو

صنعانا يار ائتدي مني زولف پر خمين

نقش عذارين ائتدي صنم خانه كؤنلومو

حئيران اوْلان جمالينا گول دن نه كام آلير

بيجا آپارما سئير گولوستانه كؤنلومو

بير گولعذاره عاشيق اوْلوب سالميشام عجب

پروانه تك بير آتش سوزانه كؤنلومو

هيجران آخيتدي بس كي گؤزومدن سرشك آل

قوْرخوم بودور كي غرق ائده طوفانه كؤنلومو

ايش بيتمز اوْلدو زهد و ريادان نباتيا

جام طربدن ائيلمه بيگانه كؤنلومو